ಅಪರಂಜಿ ಚಾಲೀಸಾ
ರಚನೆ: ರಾಂಕಿ ಬೆಳ್ಳೂರ್
ಅಪರಂಜಿಯಿಂದ ನಗೆ ಸೂಸಿದೆ ರಾಶಿ ರಾಶಿ
ಹಾಸ್ಯದಿಂದಲೇ ಬದುಕಿಹುದು ಜೀವರಾಶಿ || 1 ||
ಕೊರವಂಜಿ ಕಾಡಿಗೆ ಸಾಗಿದಳು ಅವಳಿಗಾದಾಗ ಇಪ್ಪತ್ತೈದು
ಅಪರಂಜಿಗೆ ಈಗಿನ್ನು ತುಂಬಿತು ಮೂವತ್ತ್ಐದು ಪ್ಲಸ್ ಐದು || 2 ||
ಅಂದು ಕೊರವಂಜಿ ಆಧುನಿಕ ನಗೆಪ್ರಜ್ಞೆಯ ಹರಿಕಾರಿಣಿ
ಇಂದು ಅಪರಂಜಿಯ ಓದುಗರಲ್ಲಿರುವರು ರಾಜಕಾರಿಣಿ || 3 ||
ಅಂದು ಹಾಸ್ಯದ ಕಾರಂಜಿಯ ಬೆಲೆ ಎರಡಾಣೆ ಇಂದ ಮುಂದಾಯಿತು ನಾಲ್ಕಾಣೆ
ಇಂದು ಅಪರಂಜಿಯನ್ನು ಮೂವತ್ತು ಕೊಟ್ಟಾದರೂ ಓದುತ್ತಿಲ್ಲ ಏಕೆ?…ನಾಕಾಣೆ ! || 4 ||
ಸದಾಕಾಲ ನಗೆಗಡಲಲ್ಲಿ ಮುಳುಗಿರಲು ಇಷ್ಟ ಎಮಗೆ
ಕೊರವಂಜಿ ಅಪರಂಜಿ ಟ್ರಸ್ಟ್ ಮೇಲೆ ಅಪಾರ ಟ್ರಸ್ಟ್ ನಮಗೆ || 5 ||
ಬಣ್ಣ ಬಣ್ಣದ ನಗೆಲೇಖನ ಹೊತ್ತು ತಂದ ಕೊರವಂಜಿಯ ಹುಟ್ಟುಹಬ್ಬ
ನಾಡೆಲ್ಲವು ಬಣ್ಣಗಳಿಂದ ಓಕುಳಿಯ ಆಡುವ ಕಾಮನಹಬ್ಬ || 6 ||
ಶ್ರಾವಣ ಮಾಸದಲ್ಲಿ ಜನಿಸಿದಳು ಅಪರಂಜಿ
ಇಂದಿಗೂ ಬೀರುತಿಹಳು ತಿಳಿನಗೆಯ ಕಾರಂಜಿ || 7 ||
ರಾಶಿ-ಕಸ್ತುರಿ-ಲಕ್ಷ್ಮಣ್-ಕೈಲಾಸಂ
ಒಬ್ಬೊಬ್ಬರೂ ಹಾಸ್ಯದಲ್ಲಿ ಜಸ್ಟ್ ಆಸಂ || 8 ||
ಕೊರವಾವಲೋಕನ ಸಮಾಜದ ಏರುಪೇರುಗಳುಳ್ಳ ಲೇವಡಿಯ ಕಾಲಂ
ಅಪರಂಜಿಯನ್ನು ಓದಲು ನೋಡಬೇಕೇ ರಾಹುಕಾಲಮ್ || 9 ||
ಅಂದಿಗೂ ಇಂದಿಗೂ ಹಾಸ್ಯದ ಹೂರಣದ ಅಂಕಣ
ನಗೆ ಬರಹಗಾರರು ಕಟ್ಟಿರುವರು ನಮ್ಮನ್ನು ರಂಜಿಸಲು ಕಂಕಣ || 10 ||
ಅಪರಂಜಿಯನ್ನು ಮನೆ-ಮನಗಳೊಳಗೆ ಬರಮಾಡಿಕೊಂಡೆವು
ಮುಂದಿನ ಸಂಚಿಕೆ ಬರುವುದನ್ನೇ ಕಾದುನಿಂತೆವು || 11 ||
ಕೊರವಂಜಿ ಅಪರಂಜಿಗೆ ಬರಹಗಳನ್ನು ಕೊಟ್ಟಿದ್ದಾರೆ ಹಲವರು
ಚುಟುಕ-ಅಣಕವಾಡು-ವ್ಯಂಗ್ಯ ಚಿತ್ರ ಕಳುಹಿಸಿದ್ದಾರೆ ಅನೇಕರು || 12 ||
ಸಂಪಾದಕರು-ಬರಹಗಾರರು-ಓದುಗರು ಅಪರಂಜಿಗೆ ಬೆಸ್ಟ್
ಮುದ್ರಕರು-ಟ್ರಸ್ಟಿಗಳು-ಆಡಳಿತ ವರ್ಗ ನಡೆಸುವರು ನಗೆ ಫೆಸ್ಟ್ || 13 ||
ಸಂಕ್ಷಿಪ್ತವಾಗಿ ಹೇಳುವೆ ಕೇಳಿ: ಹತ್ತು-ನೂರು-ಸಾವಿರ
ಬಿಡಿ-ವಾರ್ಷಿಕ-ದಶಕ – ಇದುವೇ ಚಂದದ ವಿವರ || 14 ||
ಕೊರವಂಜಿಯ ಹೊರತಂದರು ಶಿವರಾಮ
ಅಪರಂಜಿಗೆ ಬೆನ್ನೆಲುಬೇ ಶಿವ-ರಾಮ || 15 ||
ನಗೆ ಚಿಲುಮೆಯನ್ನು ನೋಡಲು ನಮಗೆಲ್ಲಿಲ್ಲದ ಉತ್ಸಾಹ
ಅಪರಂಜಿಯ ಕಿಡಿಗೆ ಪ್ರಕಾಶರ ಪ್ರೋತ್ಸಾಹ || 16 ||
ಕೊರವಂಜಿ ಅಪರಂಜಿಗೆ ಅಂದು ತಿಳಿಹಾಸ್ಯವ ಕೊಟ್ಟಿದ್ದು ಸುನಂದ
ತುಂತುರು ಹನಿಗವನಗಳ ಓದಲು ಬೇಕು ದಂ..ನ ಆ ನಂ ದ || 17 ||
ರಾಯಸಮ್ ಬರೆದ ‘ನಾ ಕಂಡ ಬೀಚಿ’ ಓದಿ ಆಗುವುದು ಉಲ್ಲಾಸ
ಪಾಯಸಮ್ ಕುಡಿದಷ್ಟು ನಮಗೆ ಕೊಡುವುದು ಹರ್ಷೋಲ್ಲಾಸ || 18 ||
ನೀನನ್ ರಘುಪತಿ ನಾಗನಾಥ್
ವ್ಯಂಗ್ಯಕ್ಕೆ ಇವರದೆಂದಿಗೂ ಸಿಕ್ಕಿದೆ ಸಾಥ್ || 19 ||
ಹಾಗೂ ಇನ್ನೂ ಸೇರುವರು ಅಪರಂಜಿಯ ಹೆಮ್ಮೆಗೆ
ವ್ಯಂಗ್ಯ ಬಿಡಿಸುವ ನಂಜು-ದತ್ತು-ಪೈ- ಹೆಮ್ಮಿಗೆ || 20 ||
ಬೇಲೂರು ಗುಂಡೂ ಡುಂಡಿ ತಿರುಮಲೇಶ ಐತಾಳ
ಪ್ರೀತಿಯಿಂದ ನಾವು ಹತ್ತಿಸಿಕೊಂಡಿದ್ದೇವೆ ನಗೆ ಎಂಬ ಬೇತಾಳ || 21 ||
ಅಪರಂಜಿಗೆ ಈಗ ನಲವತ್ತೊಂದರ ಸಂಪುಟ ಮೂರನೇ ಸಂಚಿಕೆ
ಇದನ್ನು ಕೊಂಡು ಓದುವವರು ಹೆಚ್ಚಲಿ, ಆಗಲಿ ಇನ್ನಷ್ಟು ಹಂಚಿಕೆ || 22 ||
ಅಪರಂಜಿ ಹೊರತರಲು ಬೇಕು ಅಕ್ಷರ ಜೋಡಣೆಯಲ್ಲಿ ಮುತುವರ್ಜಿ
ಅಪರಂಜಿ ದಿನವೂ ಓದದಿದ್ದರೆ ನಮಗೆ ಆಗುವುದು ಅಲರ್ಜಿ || 23 ||
ಪಾಸಿಟಿವ್ ಆಗಿರಲು ನಮಗೆ ಬೇಕೇಬೇಕು ಅಪರಂಜಿಯ ನಗೆ-ಟಿವ್ ಟಾನಿಕ್
ಜೋರಾಗಿ ನಕ್ಕಾಗ ಆಗುವ ಹರ್ಷೋದ್ಗಾರವೇ ಸೂಪರ್ ಸೋನಿಕ್ || 24 ||
ಅಪರಂಜಿಯ ಚಿಲುಮೆ ಹರಡಲಿ ಒಳನಾಡಿನಲ್ಲೂ
ಅವಳ ಒಲುಮೆ ಪಸರಿಸಲಿ ಹೊರನಾಡಿನಲ್ಲೂ || 25 ||
ಅಂದಿಗೆ ಇದ್ದದ್ದು ಕುಹಕಿಡಿಗಳು ಉರಿಗಾಳು
ನಮ್ಮ ನಿಮ್ಮಲ್ಲಿಹುದು ಇಂದು ಹಾಸ್ಯದ ಹುರಿಗಾಳು || 26 ||
ಕೊರವಂಜಿಯ ಯಶಸ್ಸಿಗೆ ಕೇಫ-ಆ ರಾ ಸೇ-ರಾಮಿ-ದಾಶರಥಿ
ಅವಳನ್ನು ಹುಮ್ಮಸ್ಸಿನಿಂದ ಓದುವರು ಅನೇಕ ಮಹಾರಥಿ || 27 ||
Punchಗೆ ಪಂಚ್ ಕೊಟ್ಟ ಪುಸ್ತಕ ಕೊರವಂಜಿ
Punಚ ಕಜ್ಜಾಯಗಳನ್ನೊಳಗೊಂಡಿದೆ ನಮ್ಮ ಅಪರಂಜಿ || 28 ||
ಸೇತುರಾಮನಿಂದ ಶಿವರುದ್ರನಿಗೆ ರಾಜರತ್ನದ ಹಾರಾ
ಸತ್ಯ ಜೋಶಿಯ ಅಣುಕು ರಾಮನ ಮಿತ್ರನೇ ಬೀರಣ್ಣ ಅಕ್ರೂರ || 29 ||
ಲೋಕ ಕಲ್ಯಾಣಕ್ಕಾಗಿ ನಮಗೆ ಕೊಟ್ಟರು ಹಾಸ್ಯೋತ್ಸವ
ಕ್ಷಣ ಕ್ಷಣವೂ ಸಂಭ್ರಮಿಸಬಹುದು ಈ ನಿತ್ಯೋತ್ಸವ || 30 ||
ಅಪರಂಜಿಗೆ ಜಯಶ್ರೀ ಪುಷ್ಪಲತೆಯ ಚಿತ್ರ ಅಭಯಂ
ನುಗ್ಗೇಹಳ್ಳಿಯಿಂದ ಸುಮಾ ವೀಣಾರ ನಿರ್ಮಲ ಆರತಿ ಮಂಗಳಂ || 31 ||
ಗಣನಾಥನ ಪದಕುಲುಮೆ
ಮಿರ್ಲೆ ವಾಣಿಯ ಪದ ಚಿಲುಮೆ || 32 ||
ಅಪರಂಜಿ ಗೋಪಾಲಕೃಷ್ಣ ನಾಥನಿಗೆ ಶೇಷಗಿರಿ
ಅಪರಂಜಿ ಓದುಗವರ್ಗದವರಿಗೆ ಹಾಸ್ಯದ ಸಿರಿ || 33 ||
ಅಸಂಖ್ಯಾತ ಕೊರವಂಜಿ ಅಪರಂಜಿಗಳಲ್ಲಿದೆ ವಿಡಂಬನೆಯ ವಿನೋದ
ತಿಳಿ ಹಾಸ್ಯಗಳಿಂದಲೇ ಪ್ರಖ್ಯಾತಿ ಗಳಿಸಿದೆ ಅಪರಂಜಿಯ ನಿನಾದ || 34 ||
ಅನಂತದುದ್ದಕ್ಕೂ ಅಡಗಿಹುದು ತಿಳಿನಗೆಯ ಲಾಫ್ಟರ್
ಅಪರಂಜಿಯ ಶಿವಕುಮಾರ್ ಧೀಮಂತ ಮಾಸ್ಟರ್ || 35 ||
ಹಾಸ್ಯವನ್ನೊಳಗೊಂಡಿರುವ ಅಪರಂಜಿಯೇ ಪವಿತ್ರ ಗ್ರಂಥ
ಕನ್ನಡಿಗರಿಗೆಂದಿಗೂ ಇದು ನಮ್ಮದೇ ಸ್ವಂತ || 36 ||
ಅಪರಂಜಿಯ ದಿನವೂ ಓದಿದರೆ ಆರೋಕ್ಯಸಾಮಿ
ನಗೆಗಡಲಲ್ಲಿ ಮಿಂದೆದ್ದರೆ ಪ್ರಶಾಂತ ಸಾಮಿ || 37 ||
ವಿದ್ಯೆ ಬೇಕು ಪದಬಂಧ ಬಿಡಿಸಲು, ಮುಳುಗಿದರದರಲ್ಲಿ ಅದುವೇ ಹಾಲ ಭಾವಿ
ನಕ್ಕು ನಲಿಯದೆ ನಗೆ-ಹಾಸ್ಯ ಇಲ್ಲದಿದ್ದರೆ ಜೀವನವೇ ಹಾಳ ಭಾವಿ || 38 ||
ದಿನವೂ ಪಠಿಸಿರಿ ಈ ಅಪರಂಜಿ ಚಾಲೀಸಾ
ಪಡೆಯಿರಿ ಕಾರಂಜಿಯಂತೆ ಹಾಸ್ಯದೊಡೆಯ ಗಣಪನ ಕೃಪೆ, ಸಾ! || 39 ||
ಇದನ್ನು ಪ್ರಕಟಣೆಗೆ ಒಪ್ಪಬೇಕು ಶಿವೂ ಮತ್ತು ಬೇಲೂರ್
ರಚಿಸಿದ್ದಕ್ಕೆ ಸಾರ್ಥಕ ಎಂದುಕೊಳ್ಳುವರು ಅಪರಂಜಿಯ ಓದುಗ ರಾಂಕಿ ಬೆಳ್ಳೂರ್ || 40 ||